ත්‍රිමාණ ලෝකෙක අපේ ප්‍රක්ෂිප්ත

අක්ෂීය ඒකතල බල විතරක් යෙදෙන..
ඉඳලා හිටලා ඝර්ෂණයක් තිබ්බත් ඒක තලය පුරා නියතව තියෙන
ඒකාකාරී දුස්රාවී බල ඇති ලස්සන අනාකුල දිය පාරවල් තියෙන
බාහිර ප්‍රතිරෝධී බල නැති ,
ගුරුත්වය යටතේ අපූරු නිදහස් චලිත තියෙන..
හරිම සුන්දර,
අපිටම “tailor – made” ලෝකෙක තමයි
අපි ඒ කාලෙ ජීවත් වුනේ…..

එත්  ඒ කාලෙ ඒකත් පෙනුනෙ
හරිම සංකීර්ණව…..

ඒ සුන්දර ලෝකෙන් මිදිලා
ඇත්ත ලෝකෙට අඩිය තිබ්බම තමයි තේරෙන්නෙ

ඇත්ත ලෝකෙ අක්ෂීය ඒකතල බල විතරක්ම යෙදෙන්නෙ නෑ කියලා…
ඝර්ෂණය ත්‍රිමාණ ඛණ්ඩාංක වල ශ්‍රිතයක් කියලා…
ලස්සනයි, අනාකුලයි කියලා හිතපු දිය පාරවල්
වෙලාවකට හරිම සැඩයි කියලා…
නිදහස් කියලා හිතපු චලිත වලට
හරිම සංකීර්ණ බාහිර ප්‍රතිරෝධී බල වලින්
බාධා ඇති වෙනවා කියලා…

එත් ඒ බාධක බොහොම ඉවසීමෙන් “analyse” කලොත්
බාහිර ප්‍රතිරෝධී බල මැද්දෙන්
අපේ ප්‍රක්ෂිප්ත පාලනය කරගන්න
අපිට බැරි වෙන එකක් නැහැ නේද?